सोलापूर, दि. 14
मंगळवेढा तालुक्‍यातील जंगलगी येथील पोल्ट्री फार्ममधील नऊ कोंबड्यांचा मृत्यू झाला आहे.दरम्यान या कोंबड्यांचे नमुने तपासणीसाठी प्रयोगशाळेला पाठविण्यात आले आहेत, त्याचा अहवाल अद्याप येणे बाकी असून या पक्षांचा मृत्यू बर्ड फ्लू सदृश्‍य रोगाने झाल्याचे निश्‍चित झाले आहे. परिणामी खबरदारीची उपाय म्हणून जंगलगीपासून दहा किलोमीटरचा परिसर अलर्ट झोन म्हणून घोषित करण्यात आला आहे.
सोलापूरचे जिल्हाधिकारी मिलिंद शंभरकर यांनी याबाबतचे आदेश आज काढले आहेत. राज्यात परभणी व लातूर या दाेन ठिकाणी बर्ड फ्लू ने काेबड्या मेल्यानंतर पोल्ट्री व्यवसायिकांमध्ये भीतीचे वातावरण पसरले आहे.
मंगळवेढा येथिल पशुसंवर्धन विभागाने सर्व पोल्ट्री फार्म परिसरातील कोंबड्यांची नियमित तपासणी करावी. कोंबड्यांचा मृत्यू आढळल्यास नियंत्रण कक्षाला माहिती द्यावी, कुकुट पालकांनी मेलेल्या कोंबड्यांचा किंवा आजारी पक्षांची माहिती पशुसंवर्धन अधिकाऱ्यांना व नियंत्रण कक्षाला द्यावी, जिल्ह्यातील पशुसंवर्धन विभागातील क्षेत्रिय अधिकारी व कर्मचाऱ्यांनी सर्व पोल्ट्री फार्म तसेच परिसरातील कुक्कुपालन करणाऱ्या शेतकऱ्यांना भेटी देऊन पक्षांची संख्या, पक्षांमधील मृत्यूची संख्या यांची माहिती घ्यावी, याबाबतचा सात दिवसांच्या कालबद्ध कार्यक्रमाची आखणी करण्याचाही आदेश जिल्हाधिकारी मिलिंद शंभरकर यांनी दिला आहे.
