Chandrashekhar Guruji Murder: ‘सरळवास्तू’च्या चंद्रशेखर यांची निर्घृण हत्या; हल्लेखोर आधी पाया पडले, मग चाकूनं वार केले
बंगळुरू: सरळवास्तूच्या माध्यमातून आपली वेगळी ओळख निर्माण करणारे वास्तूतज्ज्ञ चंद्रशेखर गुरुजींची हत्या झाली आहे. कर्नाटकच्या हुबळीमध्ये एका हॉटेलमध्ये दुपारी चंद्रशेखर यांची निर्घृण हत्या करण्यात आली. चंद्रशेखर हॉटेलमध्ये कोणालातरी भेटायला गेले असताना त्यांच्यावर हल्ला झाला. हा हल्ला सीसीटीव्हीमध्ये रेकॉर्ड झाला आहे. रिसेप्शनजवळ असलेल्या चंद्रशेखर यांच्यावर चाकूनं वार होत असल्याचं व्हिडीओमध्ये दिसत आहे.
चंद्रशेखर यांच्यावर हल्ला होत असलेला पाहून हॉटेलमधील काही कर्मचाऱ्यांनी त्यांच्या जवळ जाण्याचा प्रयत्न केला. मात्र हल्लेखोरांनी त्यांना चाकूचा धाक दाखवला. सुत्रांनी दिलेल्या माहितीनुसार, चंद्रशेखर गुरुजी त्यांच्या खासगी कामासाठी हुबळीला आले होते. चंद्रशेखर यांच्या हत्येमुळे परिसरात खळबळ माजली आहे. पोलिसांनी दोन हल्लेखोरांचा शोध सुरू केला आहे.
पोलिसांनी दिलेल्या माहितीनुसार, दुपारी १२ च्या सुमारास चंद्रशेखर यांची हत्या करण्यात आली. दोन व्यक्ती अनुयायी बनून त्यांच्या भेटीला आल्या होत्या. त्यांनी चंद्रशेखर यांच्यावर हल्ला केला. हल्ला केल्यानंतर दोघेही तिथून फरार झाले. घटनेची माहिती मिळताच पोलीस हॉटेलमध्ये पोहोचले. घटनास्थळाचा आढावा घेतल्यानंतर त्यांनी हल्लेखोरांचा शोध सुरू केला.
