Latest Post

धक्कादायक ! डोक्यात गोळी झाडून पोलीस अधिकाऱ्याची आत्महत्या सोलापूरच्या पालकमंत्रीपदी चंद्रकांत पाटील तर अजित पवार पुण्याचे पालकमंत्री..

श्री सिद्धरामेश्वर स्थापित अष्टविनायक

ग्रामदैवत शिवयोगी श्री सिध्दरामेश्वर महाराजांनी सोलापूरमध्ये (सोन्नलगी) शहरावर कोणतिही नैसर्गिक आपत्ती येऊ नये यासाठी स्वहस्ते स्थापन केलेल्या अष्टविनायकांची दिशा, निर्देशात्मक स्थान व त्यांची नावे यासंबंधीची तपशीलवार माहिती १३ व्या शतकात कर्नाटकातील हंपी येथे होऊन गेलेले विद्वान कवी राघवांक यांनी सिद्धरामाच्या चरित्रात लिहून ठेवली आहे.
राघवांक कवीने वर्णन केल्याप्रकरणी श्री गणेशाच्या सर्व आठही मूर्ती आजसुध्दा सोलापूरच्या आजूबाजूला पाहावयास मिळतात.

4) चौथा गणपती
करी गणपती
देगाव, ता. उत्तर सोलापूर

नैऋत्य नामे करी गणपती
देगाव तांड्याजवळच राही |
क्षणिक सुख विषयात जाणुनी
आत्मसुख तो अविरत घेई ||

ग्रामदैवत श्री सिध्दरामेश्वर महाराजांनी स्वहस्ते स्थापन केलेला चौथा गणपती म्हणजे देगाव लमाण तांड्यावरील करी गणपती होय. सोलापूरच्या नैऋत्य दिशेला म्हणजे उत्तर सोलापूर तालुक्यातील देगाव या गावाच्या समोर असलेल्या करीमसाहब मुल्ला या पैलवानाच्या शेतात करी गणपती मंदिर आहे.
करी गणपतीची उंची चार फूट असून त्यामानाने मंदिर खूपच लहान आहे. ‘करीगण’ या कन्नड नावाचा अर्थ ‘काळे डोळे’ असलेला असा आहे तसेच जुन्या कन्नड शब्दकोषात ‘काळी सोंड’ असलेला हत्ती असाही आहे.
या गणपतीच्या दर्शनाचे विशेष फळ म्हणजे दृष्टिबाधा म्हणजे नजर लागलेल्या लहान बालकांची सर्व पिडा दूर होते व दृष्टिदोषाचे निवारण होते, अशी या गणपतीची ख्याती आहे.
हा गणपती एका मुस्लिमधर्मिय कुटुंबाच्या मालकीच्या शेतात असला तरी त्याचे अस्तित्व अत्यंत सुरक्षित आहे. येथे नित्यनियमाने पूजा करण्यात येते. येथे येणाऱ्या भाविकांचे भक्तिभावाने स्वागत आणि आदरभाव व्यक्त केला जातो. यातून राष्ट्रीय एकात्मतेचे दर्शन होते.
करी गणपतीचे मंदिर रस्त्याच्या कडेला असून रस्त्यावरून येणाऱ्या जाणाऱ्या भाविकांनाही गणपतीचे सहजच दर्शन घडते. मंदिराशेजारी जिल्हा परिषद शाळा असून वातावरण अगदी प्रसन्न असे आहे.
ग्रामदैवत श्री शिवयोगी सिद्धरामेश्वर यांच्या मकर संक्रांतीच्या वेळेस होणाऱ्या यात्रेचा प्रारंभ देखील या विघ्नहर्त्या करी गणपतीच्या पूजनाने करण्यात येतो.

Leave a Reply

Your email address will not be published. Required fields are marked *